Kryetari i Komunës së Mitrovicës, Faton Peci, ka njoftuar se ekipet e zjarrfikësve, Shoqata e Kërkim-Shpëtimit, vullnetarë, Policia dhe FSK-ja janë angazhuar për shuarjen e zjarrit që ka përfshirë kodrën e Cërnushës.
Peci ka vlerësuar intervenimin e shpejtë të ekipeve, duke falënderuar të gjithë ata që u përfshinë në aksionin për shuarjen e zjarrit.
“Shpërndarjes së shpejtë të zjarrit në kodrën e Cërnushës iu përgjigjën shpejt ekipet e zjarrfikësve, bashkë me Shoqatën e Kërkim-Shpëtimit, vullnetarë, si dhe akterët e sigurisë, Policia e FSK”, ka shkruar Peci.
Ai ka bërë apel te qytetarët që të kenë kujdes të shtuar, veçanërisht për shkak të temperaturave ende të larta.
“Ju lutem shumë të keni kujdes të shtuar kur temperaturat janë ende të larta, sepse pasojat mjedisore mund të jenë katastrofale”, ka apeluar ai. /Telegrafi/