Antoine Semenyo ka pranuar se po e fajëson veten për rastet e humbura në humbjen 4-2 të Manchester Cityt ndaj Paris Saint-Germainit në Ligën e Kampionëve.
Sulmuesi i Cityt pati disa mundësi për të shënuar në përballjen ndaj kampionëve francezë, por nuk arriti t’i konkretizonte. Pas ndeshjes, ai pranoi se është i zhgënjyer me paraqitjen e tij para portës.
“Për momentin, po e fajësoj veten për të gjitha rastet që i humba”, deklaroi Semenyo për CBS Sports.
Megjithatë, ai theksoi se skuadra duhet të përqendrohet te aspektet pozitive dhe të vazhdojë përpara.
“Duhet t’i marrim gjërat pozitive nga kjo ndeshje dhe të vazhdojmë tutje”, shtoi ai.
Semenyo goditi traversën dhe më pas qëlloi rrjetën e jashtme, në përpjekje për të shënuar pas golit të katërt të PSG-së.
Skuadra e Pep Guardiolës e pa veten në disavantazh prej tri golash që në pjesën e parë, pasi Desire Doue, Ousmane Dembele dhe Vitinha shënuan për parisienët.
Manchester City reagoi pas pushimit, me Erling Haalandin që realizoi dy gola, por kjo nuk mjaftoi për të shmangur humbjen 4-2.
Kjo ishte disfata e parë e Cityt që nga ndeshja e Superkupës së Anglisë (Community Shield).
Në fund, Semenyo vlerësoi lart kundërshtarin, duke e cilësuar Paris Saint-Germainin si një prej skuadrave më të mira në futbollin evropian.
“Patjetër që janë një prej skuadrave më të mira”, përfundoi Semenyo. /Telegrafi/