Lëvizja Vetëvendosje në Prishtinë ka reaguar lidhur me publikimin nga Komuna e Prishtinës të vendimit për dhënien në shfrytëzim për 50 vjet të hapësirës së Tulltores, si dhe të vendimeve për caktimin e lokacioneve për projekte të ndryshme.
Në reagim, VV në Prishtinë ka thënë se ministritë përkatëse i kanë vlerësuar këto vendime si të kundërligjshme dhe e kanë njoftuar Komunën brenda afatit ligjor.
Sipas tyre, kryetari i Prishtinës, Përparim Rama, duhet të japë përgjegjësi për publikimin e vendimeve pa u adresuar kundërligjshmëritë e konstatuara.
VV ka theksuar se Ligji për Shqyrtimin Administrativ të Akteve të Komunave parasheh procedura për rishqyrtimin e akteve kur konstatohet mospërputhje me ligjin.
Në reagim, kjo parti ka vënë në pikëpyetje efektivitetin e mbikëqyrjes së ligjshmërisë nëse, sipas saj, Komuna vazhdon me publikimin e vendimeve pavarësisht vlerësimeve të institucioneve përgjegjëse.
“Prishtina është kryeqyteti i Republikës. Nuk është republikë e Përparim Ramës!”, thuhet në reagimin e Pikës së VV-së në Prishtinë.