Ministri i Shëndetësisë, Arben Vitia sot ka vizituar nënën dhe foshnjën e parë të lindur nga një shtatzëni përmes shërbimit të fertilizimit të asistuar mjekësor.
Vitia përmes një postimi në rrjetin social në Facebook ka shkruar se kjo është një arritje e jashtëzakonshme në shëndetësi, një shpresë e mundësi për të gjithë që dëshirojnë ta realizojnë ëndrrën e prindërimit.
“Lind foshnja e parë përmes fertilizimit të asistuar mjekësor në QKUK. Sot vizitova nënën dhe vajzën e saj, foshnjën e parë të lindur nga një shtatzëni përmes shërbimit të fertilizimit të asistuar mjekësor. Arritje e jashtëzakonshme në shëndetësi, një shpresë e mundësi për të gjithë që dëshirojnë ta realizojnë ëndrrën e prindërimit. Nënës i urova shumë gëzime pranë vajzës së saj, e vogëlushes jetë të gjatë e të shëndetshme!”, ka shkruar Vitia.
Tutje ministri ka falënderuar të gjithë stafin e Klinikës së Gjinekologjisë për angazhimin, profesionalizmin dhe kujdesin e pandërprerë ndaj pacientëve. /Telegrafi/