Forcat Operative Speciale të Forcës së Sigurisë së Kosovës, Policisë së Kosovës dhe forcave partnere nga Shtetet e Bashkuara të Amerikës, Shqipëria dhe Kroacia janë bërë bashkë në kuadër të stërvitjes shumëkombëshe “VALOR SHIELD 2026”, e cila u zhvillua në disa lokacione në mbarë Kosovën.
Në një postim të Ambasadës së ShBA-së në Prishtinë, thuhet se kjo stërvitje kishte për qëllim forcimin e kapaciteteve në fushën e operacioneve speciale, rritjen e ndërveprueshmërisë ndërmjet forcave pjesëmarrëse, si dhe thellimin e bashkëpunimit rajonal në fushën e sigurisë, raporton IndeksOnline.
Një kontribut të rëndësishëm në realizimin e këtij ushtrimi dhanë Ambasada e Shteteve të Bashkuara të Amerikës në Kosovë dhe Grupi i saj Ushtarak (MILGP), të cilët mbështetën bashkëpunimin ndërmjet institucioneve vendore dhe partnerëve ndërkombëtarë.
“Shtetet e Bashkuara mbeten të përkushtuara për të mbështetur institucionet e sigurisë së Kosovës dhe për të ndërtuar partneritete më të forta me aleatët tanë”, thuhet në njoftim.

