Rusia po pengon civilët në qytetin e pushtuar të Oleshky-t, në rajonin e Khersonit, të marrin ushqime dhe ndihma humanitare, pavarësisht përpjekjeve të Ukrainës për t’i ndihmuar ata.
Kjo është thënë nga presidenti Volodymyr Zelenskyy gjatë një fjalimi me video në Forumin e Sigurisë së Varshavës të hënën, më 12 tetor, shkruajnë mediat ukrainase.
“Rusët po pengojnë të rriturit dhe fëmijët të marrin ushqim. Nuk bëhet fjalë thjesht për uri atje, por për gjenocid. Ne po përpiqemi t’i ndihmojmë këta njerëz, por ata ndodhen nën pushtim”, citohet të ketë thënë Zelensky.
Më 16 shtator, gazeta gjermane Bild raportoi se Oleshky ndodhej nën një bllokadë humanitare.
Banorët treguan se kishin mbijetuar gjatë verës falë perimeve të kultivuara në kopshtet e tyre, por përballeshin me rrezikun e urisë ndërsa sezoni i kultivimit po përfundonte.
Dërgesat e fundit të rregullta me ushqime kishin mbërritur në fund të majit.
Gjithashtu më 16 shtator, Komisioneri ukrainas për të Drejtat e Njeriut, Dmytro Lubinets, deklaroi se Rusia kishte penguar në mënyrë të përsëritur përpjekjet për evakuimin e civilëve nga Oleshky, pavarësisht marrëveshjeve dhe përgatitjeve të mëparshme për një mision evakuimi.
Banorët e dëshpëruar po përpiqeshin të largoheshin përmes fushave të minuara, tha ai.
Ndërkohë më 20 shtator, ministri i Jashtëm Andrii Sybiha njoftoi se Ukraina do ta ngrinte çështjen e krizës humanitare në Oleshky dhe në komunitete të tjera të pushtuara të rajonit të Khersonit në Asamblenë e Përgjithshme të OKB-së.
Më 26 shtator, Sybiha u bëri thirrje organizatave ndërkombëtare që të mobilizonin burimet për të dërguar ndihma humanitare në qytet. /Telegrafi/