Ish-presidenti i Malit të Zi dhe presidenti i nderit i Partisë Demokratike të Socialistëve, Milo Gjukanoviq, ka mohuar pretendimet se ka lidhje me doktorin Ilija Srdanoviq, bartësin e listës “Lista Studentore – Studentët fitojnë” në Serbi, shkruan Telegrafi.
Në një deklaratë për gazetën malazeze Pobjeda, Gjukanoviq tha se ka shumë miq në Serbi, përfshirë edhe mjekë, por se Srdanoviq nuk është njëri prej tyre.
“Madje, nuk kam pasur as kënaqësinë ta njoh”, deklaroi Gjukanoviq.
Reagimi i tij erdhi pasi disa media dhe politikanë të afërt me presidentin serb Aleksandar Vuçiq pretenduan se Gjukanoviq, nëpërmjet Listës Studentore, po përpiqet ta rrëzojë pushtetin aktual në Serbi, shkruan ky medium.
Sipas këtyre pretendimeve, lidhja mes tyre ishte pikërisht Srdanoviqi, i cili deklarohet si malazez dhe është paraqitur si mjek personal i Gjukanoviqit.
Gjukanoviq i cilësoi këto akuza si të pavërteta dhe si pjesë të fushatës parazgjedhore në Serbi. Ai vlerësoi se Srdanoviqi po e injoron në mënyrë dinjitoze fushatën e drejtuar kundër tij.
Ish-presidenti malazez tha se sot nuk është e lehtë të jesh malazez në Serbi, duke pretenduar se nacionalistët serbomëdhenj po krijojnë një atmosferë armiqësore. Megjithatë, ai shprehu bindjen se shumica e qytetarëve të Serbisë nuk e mbështesin një qasje të tillë.
Njëri nga zërat më të fuqishëm pas këtyre akuzave ishte kryetari i Partisë Popullore Demokratike të Malit të Zi, Millan Knezheviq. Gjatë pjesëmarrjes në fushatën e Partisë Përparimtare Serbe në Beograd, ai e cilësoi Srdanoviqin si “kandidat të DPS-së”, parti kjo që ishte udhëhequr nga Gjukanoviq.
Knezheviq pretendoi se Gjukanoviq nuk ia ka falur Vuçiqit ndryshimin e pushtetit në Mal të Zi më 30 gusht 2020. Sipas tij, pa mbështetjen e Vuçiqit, Kishës Ortodokse Serbe dhe qytetarëve që votuan, largimi i Gjukanoviqit nga pushteti nuk do të kishte ndodhur.
Gjukanoviq, nga ana tjetër, i hodhi poshtë të gjitha pretendimet për lidhje personale ose politike me Srdanoviqin, duke i quajtur ato trillime të prodhuara për nevojat e zgjedhjeve në Serbi./Telegrafi/.