Turki Alalshikh ka bërë një deklaratë befasuese për këngëtaren me origjinë shqiptare, Dua Lipa, gjatë konferencës për shtyp për promovimin e superduelit mes Tyson Fury dhe Anthony Joshua.
Dy boksierët britanikë u përballën për herë të parë të mërkurën në mbrëmje, pasi javën e kaluar u konfirmua zyrtarisht dueli i shumëpritur mes tyre.
Gjatë konferencës, Alalshikh, i cili është një nga figurat kryesore pas organizimit dhe financimit të kësaj përballjeje, foli për procesin e përzgjedhjes së stadiumit ku do të zhvillohet meçi.
Foto: EPA
Fillimisht, Madison Square Garden në New York dhe Wembley në Londër ishin përmendur si opsione të mundshme, por tashmë është konfirmuar se dueli do të zhvillohet në Principality Stadium në Cardiff të Uellsit.
Duke shpjeguar vendimin për stadiumin, Alalshikh bëri një koment të papritur për Dua Lipën, duke pretenduar se këngëtarja nuk do të performonte në Londër.
Foto: Getty Images
“Do të jem i sinqertë. E di që Londra nuk do të ma jepte stadiumin deri në orën 2 të mëngjesit dhe e di që Dua Lipa nuk do të performonte në stadium, sepse nuk i pëlqen boksi dhe ndoshta nuk më pëlqen as mua”, deklaroi Alalshikh.
Deklarata e tij shkaktoi reagime gjatë konferencës, teksa mbetet për t’u parë nëse Dua Lipa do t’i përgjigjet publikisht pretendimit të tij. /Telegrafi/
Foto: Getty Images