Presidenti i Ukrainës, Volodymyr Zelensky, ka kritikuar Shtetet e Bashkuara për vendimin për të mos zbatuar masat e parashikuara në Aktin e Lindsey Grahamit, i cili synonte të ushtronte presion ndaj Rusisë për t’i dhënë fund luftës në Ukrainë.
Reagimi i tij vjen në një kohë kur, sipas Zelenskyt, Rusia ka intensifikuar sulmet ndaj infrastrukturës energjetike ukrainase.
Ai shprehu keqardhje për qëndrimin e Uashingtonit, duke vlerësuar se moszbatimi i masave të tilla dobëson presionin ndaj Moskës.
“Nuk duhet të dorëzohemi, por duhet të përpiqemi t’i japim fund luftës”, deklaroi lideri ukrainas.
Zelensky theksoi se synimi duhet të jetë përfundimi i konfliktit, e jo krijimi i kushteve që presidenti rus, Vladimir Putin, të ketë arsye për ta vazhduar atë pafundësisht.
Akti i Lindsey Grahamit lidhet me nismën për vendosjen e masave ndëshkuese ndaj Rusisë, me synimin për ta detyruar Moskën të bëjë hapa drejt përfundimit të luftës.
Ligji, i nënshkruar nga presidenti amerikan në muajin shtator, parashihte tarifa deri në 500 për qind për mallrat ruse, si dhe tarifa prej 100 për qind për produktet nga vendet që janë ndër pesë blerësit më të mëdhenj të naftës dhe gazit rus. Ato synonin gjithashtu vendet që ndihmojnë Moskën të shmangë sanksionet ndërkombëtare.
Pezullimi do të mbetet në fuqi derisa presidenti dhe sekretari amerikan i Shtetit, në konsultim me sekretarin e Thesarit dhe përfaqësuesin amerikan për tregtinë, të vendosin se masat duhet të zbatohen. /Telegrafi/