Një 29-vjeçar është arrestuar në Yverdon-les-Bains të kantonit Vaud në Zvicër, pasi dyshohet se me veturën e tij ka shkelur disa rregulla të trafikut dhe është përpjekur t’i godiste disa këmbësorë pranë sheshit të stacionit të trenit, Place de la Gare.
Policia e arrestoi të enjten vonë të dyshuarin, shtetas zviceran dhe banor të Yverdon-les-Bains, derisa ishte në timonin e automjetit të tij.
Sipas policisë kantonale të Vaudit, gjatë incidentit ai ka goditur edhe disa pajisje të mobilimit rrugor. Një person, gjithashtu banor i Yverdon-les-Bains, ka bërë kallëzim penal ndaj tij.
Pas arrestimit, 29-vjeçari u dërgua në stacionin policor dhe u mor në pyetje nga prokurori kujdestar.
Prokuroria ka hapur procedurë penale ndaj tij dhe ka kërkuar që i dyshuari të mbahet në paraburgim.
Ai aktualisht ndodhet në paraburgim, ndërsa vendimi për masën e mëtejshme do të merret nga gjykata kompetente.
Motivi i incidentit ende nuk është bërë i ditur. /Telegrafi/