Vetëm katër skuadra në pesë ligat kryesore evropiane e ruajnë ende statusin e të qenit të pamposhtura për sezonin e ri futbollistik. Lazio, Roma, Bayern Munich dhe Borussia Dortmund janë të fundit që po rezistojnë pa asnjë humbje, pasi shumë prej favoritëve të hershëm pësuan goditjet e para.
Barcelona ishte mes atyre që po shijonte një nisje të përsosur, duke fituar çdo ndeshje në kampionat përpara se disfata në El Clasico ndaj Real Madrid t’i jepte fund ecurisë së tyre.
Kjo humbje do të thotë se La Liga nuk ka më asnjë përfaqësues të pamposhtur, duke zhvendosur gjithë vëmendjen te dy klube në Gjermani dhe dy në Itali. Ndërsa prania e Bayern Munich në këtë listë nuk befason askënd, tre klubet e tjera kanë secila historinë e tyre të veçantë.
Dhe është pikërisht Lazio ajo që po pushton faqet e para të gazetave. Klubi romak është shndërruar në surprizën më të madhe të këtij sezoni nën drejtimin e Gennaro Gattuso.
Pas dhjetë ndeshjeve të para në Serie A, bardhekaltërit kanë grumbulluar nëntë fitore dhe një barazim. Me 28 pikë të grumbulluara, ata kryesojnë të shkëputur me tre pikë më shumë se ndjekësit, duke lënë pas skuadra si Inter, Roma, Como dhe AC Milan – një fillim mbresëlënës që po bën tifozët të ëndërrojnë.
Nga ana tjetër, edhe Roma po shijon një rrugëtim pa humbje nën urdhrat e Gian Piero Gasperini. Verdhekuqtë kanë regjistruar shtatë fitore dhe tre barazime në dhjetë javët e para, duke u pozicionuar fort në garën për titull. Ky progres është mjaft i rëndësishëm për një klub që kërkon të rikthehet te fitimi i Scudetto për herë të parë që nga viti 2001.
Në Gjermani, Bayern Munich dhe Borussia Dortmund vazhdojnë të mos njohin humbje. Të dyja skuadrat kanë siguruar pesë fitore dhe tri barazime në tetë ndeshjet e para në Bundesliga, duke u renditur med nga 18 pikë secila. /Telegrafi/