Presidentja Gordana Siljanovska-Davkova u takua me eurodeputetët Dan Barna (Renew, Rumani), Tijs Reuten (SD, Holandë), Matej Tonin (PPE, Slloveni) dhe Karlo Resler (PPE, Kroaci) në Parlamentin Evropian në Bruksel.
Tema e bisedës ishte situata aktuale në procesin e integrimit evropian të Maqedonisë, sfidat me të cilat përballet politika e zgjerimit të Bashkimit Evropian, si dhe mundësitë për tejkalimin e ngërçit të gjatë në negociatat e pranimit.
Siljanovska-Davkova kujtoi statusin 21-vjeçar të vendit si kandidat dhe angazhimin e tij të vazhdueshëm ndaj integrimit evropian, të mbështetur nga reforma të rëndësishme.
Ajo theksoi veçanërisht përputhjen e plotë me Politikën e Përbashkët të Jashtme dhe të Sigurisë të Bashkimit Evropian, si konfirmim i vendosmërisë së qartë gjeopolitike dhe mbështetjes së vazhdueshme për qëndrimet evropiane.
Sipas saj, vullneti politik për progres nuk duhet të pritet vetëm nga vendet kandidate, por edhe nga vetë Unioni, i cili ka nevojë për zgjidhje krijuese për të kapërcyer ngërçin e gjatë, pa vënë në dyshim identitetin kombëtar dhe kulturor maqedonas.
Bashkëbiseduesit ranë dakord se vendi i RMV-së është në Bashkimin Evropian, ku i përket natyrshëm, pavarësisht sfidave në rrugë.
Për disa eurodeputetë, përvoja e vendeve të tyre konfirmon se procesi i pranimit mund të jetë i gjatë dhe i mbushur me kushte të vështira, dhe progresi mund të mos njihet gjithmonë./Telegrafi/