Presidentja Gordana Siljanovska-Davkova mori pjesë sot në Samitin e Zgjerimit të Bashkimit Evropian në Bruksel, të organizuar nga Euronews.
Siljanovska-Davkova kujtoi mendimin e Komisionit Badinter të vitit 1992, i cili përcaktoi se Sllovenia dhe Maqedonia plotësojnë kushtet për njohje ndërkombëtare, veçanërisht në aspektin e rendit kushtetues dhe mbrojtjes së të drejtave të njeriut dhe të pakicave.
Sipas saj, pas më shumë se tre dekadash, pyetja se pse një vend është anëtar i Bashkimit Evropian, ndërsa tjetri ende pret perspektivën e tij evropiane, tregon mungesën e vullnetit politik midis fqinjëve të caktuar.
Duke iu referuar ndryshimeve kushtetuese, Presidentja tha se në vitin 2018, me Marrëveshjen e Prespës, vendi ndryshoi emrin e tij kushtetues, duke u paraqitur qytetarëve idenë se kjo ishte pengesa e fundit në rrugën drejt integrimit evropian.
Ajo theksoi se kërkesa e përsëritur për të ndryshuar Kushtetutën, e cila është ndryshuar 36 herë deri më tani, më shpesh nën presion të jashtëm, nuk mund ta garantojë atë, pasi vendimi është në kompetencë të Parlamentit, ndërsa legjitimiteti i saj buron nga qytetarët.
Për Siljanovska-Davkovën, Bashkimi Evropian nuk është vetëm një makinë politike dhe burokratike, por një bashkësi vlerash dhe parimesh. Duke iu referuar dispozitave të dokumenteve themeluese të BE-së në lidhje me respektimin e identitetit kombëtar dhe kulturor, ajo tha se diversiteti është një nga vlerat themelore të unitetit evropian.
Duke vazhduar me fjalën e mëparshme, kryeministrit kroat Plenkoviç, ajo kujtoi se shteti i RMV-së pret trajtim të barabartë me vendet e tjera kandidate, bazuar në zbatimin e të njëjtave rregulla dhe standarde./Telegrafi/