Veshët e bllokuar mund të shkaktohen nga faktorë të ndryshëm, që nga grumbullimi i dyllit dhe uji në vesh, deri te ndryshimet e presionit gjatë fluturimit, alergjitë, infeksionet e sinuseve apo ato të veshit të mesëm.
Nëse bllokimi lidhet me ndryshimet e presionit, mund të provoni manovrën Valsalva: mbyllni hundën dhe nxirrni ajrin butësisht ndërsa mbani gojën të mbyllur. Duhet shmangur fryrja e fortë, pasi mund të dëmtojë daullen e veshit.
Një tjetër mënyrë është të mbani hundën të mbyllur dhe të gëlltisni. Për bllokimin gjatë fluturimeve mund të ndihmojnë edhe sprejët nazalë dekongjestantë.
Kur problemi lidhet me veshin e jashtëm dhe grumbullimin e dyllit, mund të përdoren pika të posaçme për veshët ose, në disa raste, vaj mineral, ulliri apo për bebe. Kompresat e ngrohta dhe avulli mund të ndihmojnë gjithashtu.
Shpëlarja e veshit mund të jetë një mundësi për largimin e dyllit, por nuk duhet bërë nëse daullja është e dëmtuar, ka tuba në veshë, sistem imunitar të dobësuar ose infeksione të përsëritura të veshit.
Ekspertët këshillojnë të mos përdoren shkopinj pambuku apo objekte të tjera brenda kanalit të veshit, pasi mund ta shtyjnë dyllin më thellë ose të shkaktojnë dëmtime. Veshi mund të pastrohet vetëm nga jashtë me një leckë të butë dhe të lagur.
Nëse bllokimi shoqërohet me humbje dëgjimi, marramendje, dhimbje, zhurmë në vesh ose rrjedhje, duhet kërkuar këshilla mjekësore.
Kohëzgjatja e bllokimit varet nga shkaku: problemet e lidhura me presionin mund të kalojnë shpejt, ndërsa infeksionet ose grumbullimi i madh i dyllit mund të kërkojnë trajtim më të gjatë. /Telegrafi/