Harry Kane e fitoi Topin e Artë 2026, por të dhënat e publikuara nga “Goal”, duke iu referuar gazetës spanjolle “Sport” dhe platformës Betfair, tregojnë një histori krejt tjetër sa i përket mbështetjes së publikut.
Lamine Yamal mori 64 për qind të mbështetjes së regjistruar në këtë platformë, ndërsa Kane siguroi 17 për qind dhe Mbappé vetëm gjashtë për qind.
Këto shifra e vendosin talentin e Barcelonës shumë përpara dy futbollistëve që përfunduan para tij në renditjen zyrtare të Topit të Artë.
Yamal mori më shumë mbështetje se të gjithë rivalët së bashku
Sipas të dhënave të Betfair, Yamal grumbulloi 64 për qind të mbështetjes, ndërsa të gjithë kandidatët e tjerë së bashku ndanë 36 për qind.
Kane, fituesi zyrtar i çmimit, u rendit i dyti me 17 për qind, ndërsa Mbappé mori gjashtë për qind.
Shtatë kandidatët e parë përbënin 96 për qind të vëllimit të aktivitetit në platformë, ndërsa futbollistë si Michael Olise, Jude Bellingham dhe Khvicha Kvaratskhelia kishin më pak se një për qind secili.
Megjithatë, këto shifra pasqyrojnë aktivitetin dhe mbështetjen në Betfair, e jo votat zyrtare të jurisë që përcaktoi fituesin e Topit të Artë.
Kane kryesoi në parashikime, Yamal fitoi zemrat e publikut
Një tjetër detaj interesant lidhet me ecurinë e parashikimeve gjatë sezonit. Sipas analizës së Betfair, Kane kryesoi në 12 nga 15 momentet e vlerësuara, nga muaji mars deri në ceremoninë e ndarjes së çmimeve.
Yamal ishte në krye vetëm në dy raste: në muajin mars dhe më 6 tetor, kur mbështetja për fitoren e tij në platformë arriti në 34.71 për qind. Mbappé kryesoi vetëm një herë, në fillim të korrikut, gjatë Kupës së Botës.
Mesatarisht gjatë vitit, Kane kishte 25.7 për qind të probabilitetit të fitores sipas treguesve të platformës, kundrejt 15.13 për qind për Yamal dhe 9.38 për qind për Mbappén.
Kështu, ndërsa parashikimet e Betfair e vendosën Kane më shpesh si favorit, mbështetja e publikut në platformë ishte dukshëm në anën e Yamalit.
Në fund, rezultati zyrtar i Topit të Artë shkoi në favor të sulmuesit anglez. Yamal, megjithatë, e mbylli ceremoninë me çmimin e tretë radhazi Kopa, që vlerëson futbollistin më të mirë të ri në botë, dhe me një mbështetje të madhe në të dhënat e publikuara nga Betfair. /Zëri