Shtetet e Bashkuara e kanë shpallur heliumin material kritik, për shkak të rëndësisë së tij në prodhimin e gjysmëpërçuesve dhe sektorin e energjisë, si dhe shqetësimeve për ndërprerjet e furnizimit global.
Vendimi i Departamentit amerikan të Energjisë do të mundësojë fonde shtesë për prodhuesit vendorë dhe monitorim më të madh të furnizimit.
SHBA-ja është prodhuesi më i madh në botë i heliumit, ndërsa Katari dhe Rusia janë gjithashtu furnizues të rëndësishëm.
Megjithatë, eksportet nga Katari janë prekur rëndë nga konflikti në Lindjen e Mesme dhe ndërprerjet në Ngushticën e Hormuzit, ndërsa Rusia ka vendosur kufizime të përkohshme në eksport.
Sekretari amerikan i Energjisë, Chris Wright, tha se administrata Trump synon të ulë varësinë nga furnizuesit e huaj dhe të forcojë prodhimin vendor.
Ndërkohë, Evropa po përballet me vështirësi në sigurimin e heliumit, pas kufizimeve të eksportit nga Kina, e cila shërbente si rrugë tranziti për furnizimet ruse.
Pavarësisht ndalimit të importeve të drejtpërdrejta nga Rusia nga BE-ja në vitin 2024, disa furnizime raportohet se kanë vazhduar të mbërrijnë përmes Kinës. /Telegrafi/