Real Madridi po shpreh pakënaqësi të madhe me gjykimin në La Liga, pasi në skuadër ekziston bindja se kundërshtarëve po u lejohet një lojë tepër agresive. Ndeshja ndaj Valencias në Mestalla, ku madrilenët fituan, por u ndalën plot 26 herë me faulle, ka shtuar edhe më shumë zemërimin në dhomat e zhveshjes.
Sipas statistikave të publikuara nga AS, Real Madridi është skuadra ndaj së cilës janë shkaktuar më së shumti faulle këtë sezon, me 171 në 12 ndeshje. Pas tij renditen Racing me 161 dhe Sevilla me 155. Diferenca është edhe më e madhe me rivalët direktë: Atletico Madridi ka pësuar 113 faulle, ndërsa Barcelona vetëm 108.
Edhe në aspektin individual, madrilenët dominojnë këtë statistikë. Jude Bellingham është lojtari që ka pësuar më së shumti faulle në kampionat, me 31. Në mesin e dhjetë futbollistëve të parë gjenden edhe Vinicius Junior dhe Kylian Mbappe me nga 23, si dhe Arda Güler me 21 faulle të pësuara.
Pas ndeshjes në Valencia, Bernardo Silva kritikoi lejimin e lojës së ashpër nga gjyqtari, duke thënë se kjo e kishte vështirësuar shumë takimin për Real Madridin. Në klub besojnë se nuk bëhet fjalë për një rast të izoluar, por për një situatë që është përsëritur gjatë gjithë sezonit.