Marcus Rashford ka shprehur admirim të jashtëzakonshëm për Lamine Yamalin, duke parashikuar se ylli i Barcelonës mund të fitojë deri në shtatë Topa të Artë gjatë karrierës së tij.
Në një takim me tifozët e Manchester Unitedit në “Old Trafford”, ish-sulmuesi i Barcelonës zbuloi se para largimit nga klubi katalunas i kishte thënë Yamalit se, pavarësisht se kishte luajtur me shumë futbollistë të mëdhenj, talenti i tij ishte mbi të gjithë.
“Nuk kam parë kurrë një lojtar të asaj moshe me kaq shumë talent”, u shpreh ai.
Rashford e krahasoi potencialin e 19-vjeçarit me atë të Lionel Messit, duke theksuar se Yamal është lojtari më i afërt me nivelin e argjentinasit që ka parë ndër vite. “Nëse fiton shtatë Topa të Artë, nuk do të më habisë”, shtoi anglezi.
Ai foli me respekt të madh edhe për Messin, duke thënë se futbolli ndoshta nuk do të shohë më një gjeni të plotë si ai.
Ndërkohë, për Topin e Artë të këtij viti, Rashford mendon se Harry Kane e meritonte çmimin për shkak të numrit të madh të golave dhe asistimeve. /Zëri