Pas triumfit historik në ceremoninë e Topit të Artë 2026, sulmuesi i Bayern Munichut, Harry Kane, nxiti diskutime të shumta në rrjetet sociale me mesazhin e publikuar pas fitimit të çmimit më prestigjioz individual në futboll.
“Puno fort në heshtje. Lëre suksesin të bëjë zhurmën”, shkroi 33-vjeçari anglez, duke bërë që mediat dhe tifozët të spekulonin nëse bëhej fjalë për një thumbim të drejtuar ndaj rivalëve të tij në garën për këtë çmim, Kylian Mbappe dhe Lamine Yamal, të cilët mbetën pas tij në renditje.
Megjithatë, pas fitores bindëse 6-1 të Bayernit ndaj Magdeburgut në ndeshjen e Kupës, Kane sqaroi kuptimin e vërtetë të këtij mesazhi, duke mohuar se kishte synuar të provokonte dikë.
“Jo, aspak. Është një thënie që, për të qenë i sinqertë, e kam pëlqyer gjatë gjithë karrierës sime. Ajo përforcon atë se kush jam, çfarë bëj dhe mënyrën se si i qasem punës së palodhshme, disiplinës dhe përkushtimit. Shpesh më është dashur të stërvitem krejtësisht i vetëm”, deklaroi sulmuesi anglez.
Kane theksoi se mesazhi pasqyron punën që bën larg vëmendjes së publikut dhe synimin e tij për të shërbyer si shembull pozitiv për gjeneratat e reja.
“Bëhet fjalë për gjithë punën që bëj prapa skenave. Thjesht mendoj se është një thënie e mrekullueshme, nga e cila shumë djem dhe vajza të reja mund të frymëzohen dhe ta marrin si shembull pozitiv”, shtoi ai.
Në këtë mënyrë, Kane bëri të qartë se mesazhi i tij nuk ishte një thumbim ndaj rivalëve, por një shprehje e filozofisë që e ka shoqëruar gjatë gjithë karrierës: punë e vazhdueshme, disiplinë dhe përkushtim, me besimin se rezultatet do të flasin vetë. /Telegrafi/