Jose Mourinho mori një pritje madhështore në “Stadio Olimpico”, ku tifozët e Romës e nderuan trajnerin portugez para ndeshjes ndaj Real Madridit. Mbështetësit verdhekuq nuk e kanë harruar kontributin e tij në historinë e klubit, veçanërisht triumfin në edicionin e parë të Ligës së Konferencës.
Gjatë mëngjesit, një grup tifozësh të Romës u mblodhën pranë hotelit ku po qëndronte skuadra madrilene për t’i dhuruar Mourinhos një kopje të ujkonjës, simbolit të qytetit dhe të klubit italian.
Mbrëmja solli një tjetër moment emocionues, kur spikeri i stadiumit kërkoi që trajneri portugez të pritej me ovacione para prezantimit të formacionit të Real Madridit.
“Stadio Olimpico” shpërtheu në duartrokitje për Mourinhon, i cili e udhëhoqi Romën drejt trofeut të Ligës së Konferencës në vitin 2022, në edicionin e parë të këtij kompeticioni.
Ky mbetet një prej sukseseve më të rëndësishme evropiane të klubit, që një vit më vonë, nën drejtimin e portugezit, arriti edhe finalen e Ligës së Evropës, ku u mposht nga Sevilla pas penalltive në Budapest.
Në tribunën përballë bankinave u shfaq një banderolë me mbishkrimin “Hail Mou”, ndërsa rreth dhjetë minuta pas fillimit të ndeshjes, tifozët në “Curva” shpalosën një tjetër banderolë me imazhin e trajnerit. Mourinho iu përgjigj dashurisë së tyre duke dërguar një puthje drejt tribunave.
Atmosfera në stadium ishte elektrizuese që nga minutat e para. Tifozët e Romës dëshmuan edhe një herë lidhjen e veçantë me trajnerin portugez, i cili para ndeshjes kishte thënë për ta: “Këta njerëz nuk vijnë për ta parë futbollin, ata e luajnë atë”. /Telegrafi/