Portieri i Andorrës, Jesus Owono, është dënuar me 12 ndeshje pezullim nga Komiteti Disiplinor i Federatës Mbretërore të Futbollit të Spanjës, pas një ndërhyrjeje të rëndë në ndeshjen ndaj Tenerifes.
Incidenti ndodhi në kuadër të javës së 12-të të Segunda Division, në takimin që përfundoi me rezultat 2-2.
Owono kreu një ndërhyrje të ashpër ndaj sulmuesit kundërshtar, Jesús de Miguel, duke i shkaktuar një lëndim të rëndë.
Për këtë veprim, portieri u ndëshkua me karton të kuq dhe tashmë është përballur edhe me një dënim maksimal nga organet disiplinore.
Sipas mediumit AS, Komiteti Disiplinor e dënoi portierin në bazë të nenit 102 të rregullores disiplinore të Federatës, i cili parasheh pezullimin nga katër deri në 12 ndeshje për sjellje të dhunshme ndaj një kundërshtari gjatë lojës, kur ndërhyrja shkakton pasoja të rënda fizike ose traumatike.
Në rastin e Owonos është shqiptuar dënimi maksimal prej 12 ndeshjesh.
Megjithatë, ndërhyrja nuk është klasifikuar si agresion, kategori për të cilën parashihen sanksione edhe më të rënda.
Në raportin e gjyqtarit të ndeshjes thuhet se portieri u përjashtua për një përplasje të pakujdesshme me këmbën e ngritur ndaj kundërshtarit, duke përdorur forcë të tepruar, në një aksion ku topi ishte ende në lojë./Telegrafi/