Një krijues në YouTube, i njohur si Vasiliy Builds, po ndërton një automjet të pazakontë, i cili synon të zhvillojë deri në 300 kuaj fuqi dhe të jetë i ligjshëm edhe për qarkullim në rrugë publike.
Projekti bazohet në konceptin e njohur si Crosskart – një lloj kartingu me strukturë tubulare, por shumë më të fuqishëm dhe të pajisur për të përballuar terrene të ndryshme. Zakonisht, këto mjete përdorin motorë motoçikletash, ndërsa kanë sistem pezullimi dhe goma të përshtatura për vozitje jashtë asfaltit.
Megjithatë, Vasiliy synon të krijojë një version shumë më ekstrem, duke e pajisur automjetin me motor të fuqishëm, sistem pezullimi me lëvizje të gjatë dhe elemente aerodinamike aktive, transmeton Telegrafi.
Në zemër të projektit është motori i motoçikletës Suzuki Hayabusa, i njohur për performancën e tij të lartë. Ndërtuesi planifikon t’i vendosë një turbo-kompresor, me synimin që fuqia të arrijë në rreth 300 kuaj fuqi.
Përveç motorit, një nga veçoritë kryesore të këtij Crosskart-i është sistemi i pezullimit me lëvizje të gjatë, i cili pritet t’i mundësojë përballimin e terreneve të vështira, ngjashëm me automjetet e garave Trophy Truck.
Duke pasur parasysh se pesha e automjetit pritet të jetë dukshëm nën 450 kilogramë, kombinimi i peshës së ulët me fuqinë prej 300 kuajsh fuqi do t’i sigurojë një raport jashtëzakonisht të lartë fuqi-peshë, që mund të tejkalojë atë të shumë veturave sportive luksoze.
Megjithatë, projekti është ende në zhvillim. Vendosja e të gjithë komponentëve në hapësirën e kufizuar të shasisë po paraqet sfidë për ndërtuesin, i cili duhet të gjejë zgjidhje për integrimin e motorit dhe pajisjeve të tjera.
Një tjetër objektiv i rëndësishëm mbetet përshtatja e automjetit për qarkullim të ligjshëm në rrugë publike. Nëse arrin ta përfundojë projektin sipas planit, Vasiliy mund të krijojë një mjet të vogël, por me performancë të jashtëzakonshme, që kombinon aftësitë jashtë rrugës me fuqinë e një veture sportive. /Telegrafi/
– YouTube www.youtube.com