Kryetari i Mitrovicës, Faton Peci, ka bërë të ditur se të hyrat e Ndërmarrjes Publike Lokale “Stacioni i Autobusëve” janë rritur për 54 për qind, vetëm tre muaj pas emërimit të bordit të ri.
Përmes një postimi në Facebook, Peci e ka cilësuar këtë rezultat si dëshmi të efikasitetit në qeverisje, transparencës, ligjshmërisë dhe llogaridhënies.
“54% rritje e të hyrave nga Ndërmarrja Publike Lokale ‘Stacioni i Autobusëve’ për vetëm 3 muaj nga emërimi i bordit të ri”, ka shkruar Peci.
Ai u është përgjigjur edhe kritikëve që kanë ngritur pyetje për rezultatet në Mitrovicë, duke theksuar se komuna po shënon përparim në menaxhimin e ndërmarrjeve publike.
“Ata që po shtrojnë pyetje se çka ka nga Mitrovica? Ka: efikasitet në qeverisje, transparencë, ligjshmëri dhe llogaridhënie!”, ka deklaruar Peci.
Në postimin e tij nuk janë dhënë detaje shtesë për vlerën e të hyrave para dhe pas emërimit të bordit të ri, apo për faktorët konkretë që kanë ndikuar në këtë rritje. /Telegrafi/