Partia Demokratike e Kosovës i është drejtuar sot Gjykatës Kushtetuese, duke kërkuar vlerësimin e kushtetutshmërisë së procedurës së konstituimit të Kuvendit dhe formimit të Qeverisë Kurti 4.
Shefi i Grupit Parlamentar të PDK-së, Abelard Tahiri, tha se kërkesa përfshin mënyrën e zgjedhjes së kryetarit dhe nënkryetarëve të Kuvendit, si dhe ndryshimin e procedurës së votimit.
“Sapo e dorëzuam në Gjykatën Kushtetuese kërkesën për vlerësimin e kushtetutshmërisë së konstatimit për konstituimin e Kuvendit, zgjedhjes së kryetarit, mënyrës së zgjedhjes së nënkryetarëve dhe ndryshimit të procedurës së votimit të tyre”, deklaroi Tahiri para mediave.
Ai bëri të ditur se PDK-ja ka kërkuar edhe vendosjen e një mase të përkohshme deri në marrjen e vendimit përfundimtar nga Kushtetuesja.
Kuvendi u shpall i konstituuar nga kryetarja Albulena Haxhiu pa u zgjedhur nënkryetari nga radhët e PDK-së. Pas kësaj, në seancë të jashtëzakonshme u votua Qeveria Kurti 4, ndërsa PDK-ja, LDK-ja dhe AAK-ja nuk morën pjesë. Tetë deputetët e Listës Serbe votuan kundër.
Lajmi në plotësim.