Momente ankthi janë përjetuar në stadiumin “Vigorito”, pak minuta para ndeshjes mes Beneventos dhe Catanzaros.
Gabriele Arditi, futbollisti i skuadrës kalabreze, është ndier papritur keq dhe ka humbur përkohësisht ndjenjat pranë stolit të ekipit të tij.
Alarmi është dhënë menjëherë nga shokët e skuadrës, të cilët kanë njoftuar stafin mjekësor.
Ndërhyrja e shpejtë e ekipit të urgjencës së Misericordia bëri të mundur dhënien e ndihmës së parë.
Për fat të mirë, Arditi ka rifituar vetëdijen pas një kohe të shkurtër.
Megjithatë, për të përjashtuar çdo rrezik të mundshëm, futbollisti është transportuar në spital për t’iu nënshtruar ekzaminimeve të mëtejshme.
Ngjarja shkaktoi shqetësim të madh në stadium dhe vonoi nisjen e takimit me 15 minuta.
Ndeshja mes Beneventos dhe Catanzaros filloi vetëm pasi situata u vu nën kontroll.