Michael Olise, ylli i Bayern Munichut, raportohet se ka nënshkruar një marrëveshje të rëndësishme sponsorizimi me kompaninë amerikane të veshjeve sportive Nike, e cila pritet t’i sjellë miliona euro.
Sipas raportimit të Goal.com, duke iu referuar portalit Footy Headlines, reprezentuesi francez pritet të marrë rolin e Kylian Mbappés si një nga figurat kryesore të Nike në botën e futbollit.
Mbappé, ndërkohë, ka bërë një lëvizje të papritur drejt kompanisë zvicerane On, duke i dhënë fund bashkëpunimit të tij me Nike.
Olise është shndërruar në një prej emrave më të spikatur të futbollit evropian falë paraqitjeve me fanellën e Bayernit dhe kombëtaren e Francës.
Talenti dhe ndikimi i tij në lojë e kanë bërë një emër gjithnjë e më tërheqës edhe për kompanitë e mëdha sportive.
Marrëveshja e raportuar me Nike përbën një tjetër dëshmi të rritjes së vlerës së tij në tregun ndërkombëtar.
Megjithatë, shuma e saktë dhe kushtet financiare të kontratës nuk janë bërë të ditura zyrtarisht.
Artikulli i Goal.com përqendrohet te marrëveshja komerciale e Olise me Nike, jo te një transferim i tij te Real Madridi apo te zëvendësimi i Mbappés në ndonjë klub futbolli. /Zëri