Organizata Botërore e Shëndetësisë (OBSH) vlerëson se rasti i parë i regjistruar te njerëzit me virusin Samonda nuk ka gjasa të shkaktojë përhapje të mëtejshme. Megjithatë, situata po monitorohet nga afër nga autoritetet shëndetësore.
Sipas raportimeve të mediave të huaja, virusi, i cili zakonisht qarkullon te kafshët e fermave, është zbuluar te një burrë në Francë, i cili më pas ka humbur jetën.
Vlerësimet paraprake sugjerojnë se infektimi mund të ketë ndodhur pas pickimit nga një mushkonjë e infektuar në pjesën lindore të Francës. Autoritetet franceze kanë bërë të ditur se virusi qarkullon te kafshët kryesisht gjatë muajve të pranverës dhe verës, duke ngritur dyshime për një transmetim të mundshëm përmes insekteve.
Deri më tani, të dhënat e disponueshme nuk tregojnë për një rrezik të lartë të përhapjes së virusit te njerëzit. Rasti konsiderohet i izoluar, ndërsa ekspertët po vijojnë monitorimin për të identifikuar çdo zhvillim të mundshëm dhe për të sqaruar më tej mënyrën e transmetimit.
OBSH po ndjek nga afër situatën, ndërsa autoritetet shëndetësore po mbledhin të dhëna shtesë për të vlerësuar rrezikun dhe për të kuptuar më mirë karakteristikat e virusit.