Mesfushori i Barcelonës, Gavi, ka dërguar një mesazh të fortë në drejtim të Real Madridit para El Clasicos, duke bërë të qartë se nuk ka simpati për rivalët e përjetshëm.
Futbollisti spanjoll theksoi se mungesa e Vinicius Juniorit, i cili është i suspenduar për përballjen në Camp Nou, nuk e ndryshon aspak dëshirën e tij për të fituar.
“Një Real Madrid më i dobët pa Viniciusin? Nuk më intereson. Është Real Madridi dhe, në fund të fundit, do të jap maksimumin, pavarësisht se kush luan”.
Mesfushori i Barcelonës nuk u ndal me kaq, duke zbuluar edhe qëndrimin e tij ndaj lojtarëve të skuadrës madrilene dhe rëndësinë që ka fitorja për tifozët katalunas.
“Me disa lojtarë shkoj më mirë, me disa të tjerë më keq, por në fushë nuk më pëlqen asnjëri prej tyre. Shpresoj vetëm t’ua dhuroj tifozëve fitoren, sepse e meritojnë”.
Gavi foli edhe për vështirësitë që përjeton kur nuk mund të luajë për shkak të lëndimeve, duke pranuar se e ka të vështirë t’i shikojë ndeshjet nga jashtë fushës.
“Kur jam i lënduar, vuaj shumë duke i shikuar ndeshjet. Nuk mund ta duroj t’i shikoj”, përfundoi mesfushori.
Kujtojmë, përballja do të zhvillohet në “Camp Nou” nga ora 21:00./Telegrafi/