Asambleisti i Kuvendit Komunal të Prishtinës, Yll Bogaj, ka njoftuar se ka nisur aksioni për pastrimin dhe rregullimin e hapësirave të Stacionit të Autobusëve në kryeqytet.
Sipas njoftimit të tij, aksioni po realizohet në bashkëpunim me Ndërmarrjen Publike Lokale “Gjelbër”, me ç’rast po largohen mbeturinat dhe materialet e grumbulluara ndër vite.
Bogaj ka theksuar se Stacioni i Autobusëve është një nga pikat kryesore hyrëse të Prishtinës dhe se hapësirat e tij duhet të jenë të pastra, të sigurta dhe funksionale për qytetarët dhe vizitorët.
Ai ka vlerësuar se ky aksion përbën një hap drejt përmirësimit të kushteve dhe rregullimit të hapësirave publike në kryeqytet.
Në fund, Bogaj ka falënderuar ekipet e NPL “Gjelbër” dhe punëtorët e angazhuar për kontributin e tyre në realizimin e këtij aksioni. /Telegrafi/