Komuna e Podujevës ka nisur fazën e dytë të shpërndarjes së mëshqerrave në kuadër të projektit “Përkrahje me mëshqerra”, i cili synon mbështetjen e fermerëve dhe zhvillimin e sektorit të bujqësisë në këtë komunë.
Në këtë fazë po shpërndahen rreth 70 mëshqerra për fermerët përfitues, ndërsa në fazën e parë janë ndarë 56 të tilla. Sipas komunës, projekti në tërësi përfshin 162 përfitues, ndërsa pjesa e mbetur e mëshqerrave pritet të shpërndahet në fazat e ardhshme.
I pranishëm në këtë aktivitet ishte drejtori për Bujqësi, Pylltari dhe Zhvillim Rural, Behram Latifi, i cili uroi fermerët përfitues dhe theksoi se ky projekt përfaqëson vazhdimësinë e përkrahjes institucionale që Komuna e Podujevës po i ofron sektorit të bujqësisë.
Autoritetet komunale kanë vlerësuar se projekte të tilla ndikojnë drejtpërdrejt në rritjen e prodhimit vendor dhe në përmirësimin e kushteve ekonomike për fermerët në zonat rurale. /Telegrafi/