Presidenti amerikan, Donald Trump, ka deklaruar se po mendon mundësinë që reperja Nicki Minaj të bëhet zëdhënësja e re e Shtëpisë së Bardhë. Të dy kanë krijuar papritur një raport të afërt, ndërsa Minaj së fundmi, në një tubim të mbajtur në Michigan, shprehu mbështetjen e saj për Trumpin dhe u bëri thirrje votuesve që në zgjedhjet e ardhshme të votojnë për republikanët, shkruan Unilad.
Një koment i pakëndshëm gjatë tubimit.
Reperja u shfaq në tubimin e javës së kaluar, pasi Trumpi, i cili kohët e fundit po komenton gjithnjë e më shpesh pamjen fizike të të tjerëve, kishte lavdëruar paraqitjen e senatorit republikan nga Ohio, Jon Husted. Më pas, ai iu referua edhe Minajt, duke komentuar të pasmet e saj dhe duke thënë se ajo ka “një të pasme të mrekullueshme”. “Shpresoj që Nicki të mos jetë ofenduar, por ne e duam Nickin. Ajo na ka mbështetur prej kohësh”, shtoi Trumpi.
Ideja u hodh nga drejtori i komunikimit i Shtëpisë së Bardhë.
Për shkak të afërsisë së tyre, kanë nisur spekulimet se Minaj mund ta zëvendësojë Katie Zacharia, e cila qëndroi në detyrën e zëdhënëses së Shtëpisë së Bardhë për më pak se një javë. Duket se ideja u propozua fillimisht nga drejtori i komunikimit i Shtëpisë së Bardhë, Steven Cheung. Ai publikoi një fotografi me reperen, të realizuar në aeroplanin presidencial Air Force One, krahas së cilës shkroi: “Zonja dhe zotërinj, mendoj se kemi gjetur zëdhënësen e re të Shtëpisë së Bardhë!”.
Foto: Alex Wong/Getty Images
Për mundësinë që Minaj të marrë këtë detyrë është deklaruar tashmë edhe Trumpi, i cili e cilësoi si “një ide të mirë”. I pyetur nga Benny Johnson nëse Minaj do ta zëvendësojë Zacharian, presidenti amerikan u përgjigj: “Do të më duhet ta mendoj këtë”. Më pas, ai iu drejtua Johnsonit me një propozim tjetër: “Po ti, çfarë mendon nëse e merr ti këtë detyrë? Edhe ti do të ishe mjaft i mirë”. Johnson dukej se e priti me kënaqësi këtë kompliment.
Përdoruesit e rrjetit social X nuk vonuan të reagojnë ndaj mundësisë që Nicki Minaj të bëhet zëdhënëse e Shtëpisë së Bardhë.
“Administrata është në kaos të plotë. Pikërisht ashtu siç i ka hije këtij cirku”, shkroi një kritik. Një tjetër shtoi: “Shtëpia e Bardhë vazhdon ta trajtojë politikën si një spektakël televiziv. Amerikanët kërkuan deportime dhe çmime më të ulëta, jo emërimin e personazheve të famshëm në poste shtetërore”.
Megjithatë, pati edhe nga ata që e mirëpritën këtë ide.
“Duke marrë parasysh se sa shumë promovon republikanët dhe sa vëmendje mediatike u sjell atyre, do të ishte marrëzi të mos e angazhonin”, shkroi një përdorues.
“Bëjeni që të hënën! Ajo mund t’u bëjë thirrje amerikanëve të votojnë”, komentoi një tjetër.
Ndërsa një përdorues i tretë përfundoi: “Njerëzit po tallen, por Nicki Minaj tashmë prej gati dy dekadash po përballet me sukses me polemikat publike dhe skandalet mediatike. Madje, ndoshta është edhe më shumë se e kualifikuar për këtë detyrë”. /Telegrafi/