Kryetari i Komunës së Gjilanit, Alban Hyseni, ka njoftuar se nga 5 tetori do të nisin punimet në segmentin e hyrjes së rrugës Gjilan–Prishtinë, në kuadër të projektit “Rehabilitimi dhe zgjerimi i rrugës N25.2, segmenti Bresalc–Gjilan (Hyrja Gjilan)”.
Sipas njoftimit, punimet pritet të zgjasin rreth dy muaj, ndërsa kohëzgjatja mund të ndryshojë varësisht nga dinamika e realizimit të projektit.
Gjatë kësaj periudhe do të ketë kufizime në qarkullim, si dhe në qasjen e banorëve dhe bizneseve në këtë zonë.
Për të shmangur pengesat në komunikacion, qytetarëve u është rekomanduar të përdorin rrugët alternative “Pajazit Ahmeti”, në drejtim të rrethit “28 Nëntori”, si dhe rrugën “15 Qershori”, në drejtim të rrugëve “Haki Myderizi” dhe “NATO 99”.
Nga Komuna e Gjilanit kanë kërkuar mirëkuptim dhe bashkëpunim nga qytetarët gjatë zhvillimit të punimeve, duke i bërë thirrje pjesëmarrësve në trafik që të respektojnë sinjalizimin e përkohshëm dhe udhëzimet e vendosura në terren. /Telegrafi/