Shefja e Grupit Parlamentar të Lëvizjes Vetëvendosje, Arbërie Nagavci, ka pritur në takim ambasadorin e Hungarisë në Kosovë, László István Dux.
Nagavci ka bërë të ditur se në takim është diskutuar për marrëdhëniet ndërmjet dy vendeve dhe mundësitë e thellimit të bashkëpunimit bilateral.
Ajo ka vlerësuar mbështetjen e Hungarisë për Kosovën ndër vite, veçanërisht në fushën e arsimit dhe mundësitë e studimit për të rinjtë kosovarë në Hungari.
“Prita sot në takim Ambasadorin e Hungarisë në Kosovë, z. László István Dux, me të cilin zhvilluam një bashkëbisedim për marrëdhëniet ndërmjet dy vendeve dhe mundësitë për thellimin e bashkëpunimit bilateral. Vlerësova mbështetjen e Hungarisë për Kosovën ndër vite si dhe bashkëpunimin në fushën e arsimit dhe mundësitë e studimit për të rinjtë tanë në Hungari. Diskutuam gjithashtu për perspektivën evropiane të Kosovës, rëndësinë e avancimit të proceseve integruese dhe anëtarësimin në organizatat ndërkombëtare. Kosova mbetet e përkushtuar për forcimin e marrëdhënieve me Hungarinë, mbi bazën e respektit të ndërsjellë, bashkëpunimit dhe interesave të përbashkëta. E falënderova Ambasadorin Dux për vizitën dhe bisedën konstruktive”, ka shkruar ajo në facebook.