SOS Fshati aktualisht ka 25 fëmijë nën përkujdesje, ndërsa edhe rreth 12 të rinj të tjerë vazhdojnë të marrin mbështetje përmes programit të gjysmëpavarësimit, i cili synon përgatitjen e tyre për jetë të pavarur.
Përmes këtij programi, të rinjtë që arrijnë moshën madhore nuk mbeten pa përkrahje, por vazhdojnë të mbështeten në një fazë të rëndësishme të jetës së tyre, atë të kalimit drejt pavarësimit të plotë.
Mjellma Luma nga SOS Fshati, në një intervistë për emisionin Expose, ka shpjeguar se programi i gjysmëpavarësimit zgjat tre vjet dhe ka për qëllim t’u ofrojë të rinjve mbështetjen e nevojshme për të ndërtuar të ardhmen e tyre.
“Është një program i cili i përkrah të rinjtë të kalojnë drejt pavarësimit të plotë. Është program 3-vjeçar, ku përkrah të rinjtë me punësim, me shkollim, me gjithçka që i duhet një të riu që pas një kohe me qenë i pavarur dhe anëtar i denjë i shoqërisë”, ka deklaruar Luma.
Përmes këtij modeli të përkrahjes, SOS Fshati synon që të rinjtë të kenë mundësi të vazhdojnë shkollimin, të integrohen në tregun e punës dhe të fitojnë aftësitë e nevojshme për ta organizuar jetën në mënyrë të pavarur./GazetaBlic