Mbi 50 thasë me mbeturina janë mbledhur gjatë një aksioni pastrimi të organizuar në Rrugën Tirana në Prishtinë, ku morën pjesë punonjës të Hilton Prishtina dhe vullnetarë.
Lajmi është bërë i ditur përmes një postimi në Facebook, ku thuhet se aksioni u realizua në kuadër të iniciativës “Travel with Purpose” të Hilton, në bashkëpunim me organizatën “Let’s Do It Kosova”.
“Sot, së bashku me punonjësit e Hilton Prishtina dhe vullnetarët tanë, organizuam një aksion pastrimi në Rrugën Tirana, ku mblodhëm mbi 50 thasë me mbeturina!”, thuhet në postim.
Organizatorët kanë falënderuar të gjithë pjesëmarrësit për angazhimin dhe kontributin e tyre në pastrimin e hapësirave publike.
“Faleminderit nga zemra të gjithë pjesëmarrësve për energjinë, vullnetin dhe punën e mrekullueshme!”, thuhet më tej në postim.
Në fund, organizatorët kanë theksuar rëndësinë e angazhimit qytetar për një mjedis më të pastër.
“Me njerëz që e duan vendin dhe janë të gatshëm të veprojnë, çdo ditë mund të bëjmë ndryshime pozitive. Së bashku për një Kosovë më të pastër!”, përfundon postimi. /Telegrafi/