Komuna e Kamenicës ka njoftuar se pesë institucione arsimore në këtë komunë do të përfitojnë inventar në vlerë prej 132 mijë e 197 eurosh, pas nënshkrimit të Memorandumit të Mirëkuptimit ndërmjet kryetarit të komunës, Kadri Rahimaj, dhe Ministrisë së Arsimit dhe Shkencës (MASH).
Sipas njoftimit të komunës, inventari do të shpërndahet në pesë institucione arsimore: institucionin parashkollor në Koretin, institucionin parashkollor “Filizat” në Kamenicë, SHFMU “Sejdi Kryeziu” në Roganë, IAAP “Andrea Durrsaku” në Kamenicë dhe Gjimnazin “Ismail Qemali” në Kamenicë.
Ky inventar synon përmirësimin e kushteve në institucionet arsimore, duke krijuar ambiente më funksionale për zhvillimin e procesit edukativo-arsimor dhe duke mbështetur punën e mësimdhënësve.
Komuna e Kamenicës ka theksuar se do të vazhdojë angazhimin për përmirësimin e infrastrukturës dhe kushteve në institucionet arsimore, me qëllim që fëmijët dhe të rinjtë të kenë hapësira më të përshtatshme për edukim dhe mësimnxënie. /Telegrafi/