Aktori britanik Martin Freeman, i njohur për rolet e tij në serialin “Sherlock” dhe trilogjinë “Hobbit”, është martuar fshehurazi me partneren e tij prej shumë kohësh, aktoren dhe skenaristen franceze Rachel Benaissa.
Çifti është bashkë prej gjashtë vitesh, dhe lajmi për martesën e tyre u zbulua pas paraqitjes së tyre të përbashkët në Festivalin e Filmit në Londër.
Freeman dhe Benaissa rrallë shfaqen në publik së bashku, por të mërkurën në mbrëmje ata u shfaqën në tapetin e kuq në premierën e filmit “A Long Winter”, në të cilin Freeman luan, ku unazat e tyre tërhoqën vëmendjen.
Rachel, e cila është 21 vjet më e re se Freeman, mbante një unazë fejese me smerald dhe një unazë ari me dy diamante. Freeman mbante gjithashtu një unazë martese prej ari, duke ngjallur spekulime për një martesë.
Menjëherë më pas, zëdhënësi i aktorit konfirmoi për gazetën britanike The Sun se çifti ishte martuar me të vërtetë në fillim të këtij viti. Detajet e dasmës nuk u zbuluan.
Përpara lidhjes së tij me Rachel, Freeman ishte në një lidhje 16-vjeçare me aktoren Amanda Abbington, me të cilën luajti edhe në serialin e njohur “Sherlock”.
Edhe pse rrallë flet për jetën e tij dashurore, Freeman zbuloi disa gjëra interesante rreth Rachel gjatë një paraqitjeje në podkastin “Table Manners”.
“Ajo nuk është ndonjë shefe kuzhine e shkëlqyer. Është e çmendur pas djathit dhe verës”, tha ai duke qeshur.
Ai shtoi se edhe Rachel e përshkruan veten në këtë mënyrë.
“Këtë do të thoshte ajo për veten. Thotë, ‘Jam e çmendur pas djathit dhe verës’. Sigurisht, ky nuk është interesi i saj i vetëm, por ajo i do shumë këto gjëra. Ne e duam të gatuajmë së bashku”, tha aktori.