Njerëzit në Kinë mund të fillojnë të udhëtojnë me të ashtuquajturat “makina fluturuese” që verën e ardhshme, sipas prodhuesit të një mjeti me dy ulëse dhe sistem pilotimi automatik.
Deli Zhao, drejtori ekzekutiv i kompanisë kineze të makinave fluturuese XPeng, deklaroi se ky mjet për fluturime në lartësi të ulëta – me një kosto prej 300,000 dollarësh – do të jetë gati për përdorim nga individë për qëllime argëtimi në zona rurale, si dhe nga shërbimet e emergjencës, gjatë gjysmës së dytë të vitit 2027.
Pas 10 vitesh zhvillimi, mjeti ka marrë miratimin nga autoritetet kineze të aviacionit civil për përdorim të kufizuar.
Kabina e vogël ka përmasa të përafërta me ato të një makine Fiat 500.
Mjeti ngrihet në ajër përmes gjashtë helikave me bateri – të ngjashme me ato të dronëve – dhe drejtohet nga një levë e thjeshtë kontrolli (joystick).
Ai mund të fluturojë edhe në mënyrë autonome drejt një destinacioni të programuar; megjithatë, Zhao – i cili është pilot i trajnuar – pohon se mund t’i mësojë kujtdo ta drejtojë atë brenda pesë minutash.
Çmimi i këtij mjeti përfshin gjithashtu një furgon me gjashtë rrota, të përmasave të një Ford Transit, nga pjesa e pasme e të cilit nxirret dhe hapet mjeti fluturues – “pikërisht si në filmat ‘Transformers'”, u shpreh Zhao.
Ai ka punuar për zhvillimin e makinave fluturuese për gati një dekadë. /Telegrafi/