Presidenti i Rusisë, Vladimir Putin beson se Rusia nuk po fajësohet për luftën në Ukrainë, duke shtuar se të dy vendet po “ndajnë një tragjedi”.
Përmes adresimit të tij televiziv bashkë me zyrtarët e lartë ushtarakë, presidenti rus tha se ai vazhdon ta shohë Ukrainën si “komb vëllazëror”.
Ai po ashtu pohoi se konflikti ishte “rezultat i politikës së shteteve të treta” dhe jo i asaj ruse.
Kjo teori, e cila përfshin zgjerimin perëndimor në këtë kauzë, është mohuar vazhdimisht jashtë Rusisë.
Presidenti Putin deklaroi se Perëndimi u ka “shpërlarë trurin” republikave post-sovjetike, duke filluar me Ukrainën, raporton BBC, përcjell Klankosova.tv.
“Për disa vjet, jemi përpjekur të ndërtojmë marrëdhënie të mira fqinjësore me Ukrainën, duke i ofruar kredi dhe energji të lirë, por kjo nuk funksionoi. Prandaj, nuk ka arsye për të na akuzuar. Ne gjithmonë i kemi parë si njerëz vëllazëror dhe ende vazhdoj t’i shoh ashtu. Ajo çfarë po ndodh tash është një tragjedi, por nuk është faji jonë”, u shpreh Putin.
Në këtë adresim, zyrtarët ushtarake premtuan se do të vazhdojnë të ashtuquajturën “operacion special ushtarak” edhe në vitin 2023.
Kurse, ministri rus i mbrojtjes, Sergei Shoigu propozoi të rrisë moshën për shërbimin obligativ ushtarak.
Me ligjin aktual, qytetarët e moshës 18-27 vjeç mund të thirren për shërbim obligativ ushtarak, kurse Shoigu tash po propozon moshën nga 21-30 vjeçare.
Ky adresim i Putin-it doli në kohën kur presidenti i Ukrainës, Zelensky udhëtoi për në Washington./Klankosova.tv/