Maja Serafimovska Borozan nga LSDM-ja ka paralajmëruar se nga viti i ardhshëm priten rritje të tjera të çmimeve të energjisë elektrike dhe ngrohjes qendrore në Maqedoninë e Veriut.
Ajo kritikoi Qeverinë e Hristijan Mickoskit për mungesë veprimi, duke thënë se vende të tjera evropiane tashmë po marrin masa për t’u përballur me rritjen e kostove të energjisë.
Sipas Serafimovska Borozanit, kostoja e jetesës për qytetarët është shtuar për 4.000 denarë nga janari, ndërsa shporta minimale sindikale në tetor ka kaluar 70 mijë denarë. Kur përfshihet edhe qiraja, sipas saj, shpenzimet arrijnë afër 90 mijë denarëve.
Ajo theksoi se pagat nuk po e ndjekin ritmin e shtrenjtimit dhe se standardi i jetesës mbetet në rreth një të tretën e nivelit të Bashkimit Evropian.
Duke iu referuar hulumtimeve ekonomike, përfaqësuesja e LSDM-së deklaroi se vendit do t’i duheshin 52 vjet për të arritur mesataren e BE-së në mirëqenie.
Serafimovska Borozan tha gjithashtu se rreth 180 mijë punëtorë marrin më pak se 31.200 denarë në muaj, ndërsa paga minimale mbetet në 26 mijë denarë.