Dizajnerët e interierit po largohen nga kompletet tradicionale të ngrënies. Kombinimi i ngjyrave, materialeve dhe modeleve të ndryshme krijon një pamje elegante e moderne, pa pasur nevojë të blini mobilie të reja
Kuzhina ju duket monotone, por nuk dëshironi të shpenzoni për renovim? Ndonjëherë mjafton një ndryshim i vogël në këndin e ngrënies për t’i dhënë gjithë hapësirës një pamje më elegante, moderne dhe personale.
Dizajnerët e interierit po i kushtojnë gjithnjë e më shumë vëmendje një ideje të thjeshtë: karriget rreth tryezës nuk është e nevojshme të jenë të gjitha njësoj.
Për vite me radhë, tryeza e ngrënies dhe karriget bliheshin si komplet, me të njëjtën ngjyrë, material dhe dizajn. Mirëpo, në interierët bashkëkohorë po fiton terren kombinimi i modeleve, ngjyrave dhe teksturave të ndryshme.
Ky stil funksionon veçanërisht bukur në kuzhinat e bardha, gri ose me elemente druri, ku disa nuanca të zgjedhura me kujdes mund të krijojnë ngrohtësi dhe karakter pa e mbingarkuar ambientin.
unsplash
Si t’i kombinoni karriget që kuzhina të duket elegante?
Zgjidhja më e sigurt është të përdorni karrige me formë të njëjtë, por me ngjyra ose veshje të ndryshme. Kështu ruhet harmonia vizuale, ndërsa hapësira fiton gjallëri dhe nuk duket si një komplet mobiliesh i marrë drejtpërdrejt nga katalogu.
Për një interier modern dhe energjik mund të kombinoni të verdhën, ngjyrën koral, të kaltër-turkezin dhe blunë mbretërore.
Nëse parapëlqeni një atmosferë më të qetë, zgjidhni nuanca të gjelbra si sherebela, rozë të zbehtë, blu pastel dhe ngjyrën natyrale të drurit.
Një pamje më luksoze mund të krijohet me karrige të veshura me kadife në ngjyrë smeraldi, bordo ose bruz të errët. Në kombinim me një tryezë masive prej druri dhe një llambadar elegant, këto nuanca krijojnë një ambient të rafinuar dhe mikpritës.
Nuk keni nevojë të blini karrige të reja
Nëse karriget ekzistuese janë ende të forta dhe funksionale, mund t’u jepni pamje krejtësisht të re pa shpenzime të mëdha.
Karriget prej druri mund të lyhen me ngjyra të ndryshme, ndërsa atyre me ulëse të veshura mund t’u ndërrohet pëlhura ose materiali i mbështetëses.
Mund të kombinoni edhe karrige të modeleve të ndryshme, por është e rëndësishme të ruani një element të përbashkët. Për shembull, ato mund të kenë të njëjtën ngjyrë, të jenë prej materialit të ngjashëm ose të kenë lartësi dhe formë të përafërt.
Si të shmangni pamjen e çrregullt?
Dallimi ndërmjet një kombinimi elegant dhe një ambienti të mbingarkuar qëndron te harmonia e detajeve.
Ngjyrat e karrigeve mund t’i përsëritni në një pikturë muri, vazo dekorative, qilim, perde ose enë kuzhine. Kjo krijon lidhje vizuale ndërmjet elementeve dhe bën që kombinimi të duket i menduar me kujdes.
Nëse dyshemeja, muret dhe tryeza janë në ngjyra neutrale, karriget mund të bëhen elementi kryesor dekorativ i hapësirës.
Ndonjëherë, për ta bërë kuzhinën të duket më e shtrenjtë, nuk nevojiten mobilie më të kushtueshme, por një kombinim më i guximshëm i atyre që tashmë i keni. /Telegrafi/