Kryeministri i Kosovës, Albin Kurti, e ka quajtur problem të madh largimin e qytetarëve në drejtim të vendeve perëndimore. Ai ka thënë se Kosova ka juristë e politologë që duan të bëhen diplomatë, por se Kosova s’mund t’i akomodojë të gjithë në diplomaci. Sipas tij, Kosovës i mungojnë kuzhinierët e trajnuar, muratorët dhe floktarët.
“Është një problem i madh. Ne kemi shumë juristë dhe politologë që duan të bëhen diplomatë. Por ne kemi vetëm 30 ambasada. Si mund t’i akomodojmë të gjithë këta diplomatë? Ajo që i mungon tregut tonë janë, për shembull, kuzhinierë të trajnuar, muratorë apo floktarë. Kjo është arsyeja pse ne po punojmë për të zbatuar një sistem dual të arsimit si në Zvicër apo Gjermani”, ka thënë Kurti për mediumin zviceran “Tages-Anzeiger” duke komentuar edhe ardhjen e punëtorëve nga India e Tajlanda.
Kurti është pyetur se a do të përshpejtohet eksodi i të rinjve kur më 1 janar të vitit 2024 të hiqen vizat.
“Njerëzit me arsim tashmë marrin viza pune. Gjermania është tërheqëse dhe e uritur për punëtorë. Kushdo që donte të shkonte e ka shfrytëzuar shansin e tij prej kohësh. Disa kthehen dhe më pas investojnë këtu. Por është e rëndësishme që vizitat familjare të bëhen më të lehta dhe njerëzit të mund të vizitojnë Evropën Perëndimore, pa pasur nevojë të shpenzojnë shumë para për një vizë”, ka deklaruar ai.