Kryeministri i Kosovës, Albin Kurti, është takuar me presidenten e Bankës Evropiane për Rindërtim dhe Zhvillim (BERZH), Odile Renaud-Basso, në margjinat e Samitit të Procesit të Berlinit.
Sipas njoftimit të Qeverisë, në takim është diskutuar për forcimin e bashkëpunimit ndërmjet Kosovës dhe BERZH-it, si dhe për projektet infrastrukturore dhe ekonomike në vend.
Diskutimet kanë vazhduar mbi bazën e takimit të fundit që Kurti dhe Renaud-Basso kishin zhvilluar në prill, në Londër.
Kurti ka thënë se në mandatin e ri synohet që partneritetet për investime të përqendrohen në prioritetet strategjike të Kosovës.
“Në këtë mandat të ri, synojmë që partneritetet tona për investime t'i ndërtojmë mbi prioritetet strategjike të Kosovës: sigurinë energjetike dhe atë ujore, mbrojtjen, transportin e qëndrueshëm dhe infrastrukturën”, ka deklaruar Kurti.
Ai ka theksuar gjithashtu rëndësinë e BERZH-it si partner të Kosovës në rrugën drejt integrimit evropian.
Që nga anëtarësimi i Kosovës në BERZH, në vitin 2012, banka ka ofruar rreth 967 milionë euro mbështetje financiare për 151 projekte në sektorin publik dhe privat. /Zëri