KORREKT / SOT19 nëntor 2026
Botimi digjital / Kontakt
KORREKT PRESS

QARTË. ÇDO DITË.Lajmet që kanë rëndësi.

KORREKT PRESS / KËRKIM

Gjej lajmin që të intereson.

Shkruaj të paktën 2 shkronja për të kërkuar në titujt e lajmeve.

Rezultate gjatë shkrimit
Lajme

Kurti për France 24: Kosova pret statusin e vendit kandidat në BE

Kurti për France 24: Kosova pret statusin e vendit kandidat në BE

Kryeministri i Kosovës, Albin Kurti, ka deklaruar se Kosova pret që në javët ose muajt e ardhshëm të marrë statusin e vendit kandidat për anëtarësim në Bashkimin Evropian, duke theksuar se vendi i ka përmbushur detyrimet e tij në procesin e integrimit.

Në një intervistë për televizionin francez France 24, në emisionin “Talking Europe”, Kurti tha se Kosova mbetet i vetmi vend në Evropë që nuk ka statusin e kandidatit, ndonëse ka aplikuar për anëtarësim në dhjetor të vitit 2022.

Ai theksoi se pengesa kryesore lidhet me mungesën e një kërkese nga Këshilli Evropian drejtuar Komisionit Evropian për të dhënë opinionin mbi aplikimin e Kosovës.

“Ne i kemi bërë të gjitha detyrat tona. Sa u përket indekseve demokratike për sundimin e ligjit, luftën kundër korrupsionit, transparencën, lirinë e medias dhe demokracinë zgjedhore, jemi në vendin e parë ose të dytë në mesin e gjashtë vendeve të Ballkanit Perëndimor”, tha Kurti.

Ai u shpreh se Kosova është e gatshme të kalojë nëpër të gjitha fazat e procesit të anëtarësimit, pa kërkuar rrugë të shkurtra.

Duke folur për pesë vendet e BE-së që nuk e njohin pavarësinë e Kosovës, Qipron, Spanjën, Rumaninë, Greqinë dhe Sllovakinë, Kurti tha se bashkëpunimi dhe komunikimi me to është shtuar.

Sipas tij, ka shenja pozitive të përparimit, si njohja e pasaportës së Kosovës nga Spanja dhe ngritja e statusit të zyrës së Kosovës në Athinë, por njohja zyrtare ende mungon.

I pyetur për kritikat e raportit të Komisionit Evropian për vitin 2026, veçanërisht për mungesën e progresit në reformën në drejtësi dhe rezultatet e kufizuara në luftën kundër korrupsionit, Kurti pranoi se këto fusha mbeten sfidë.

“Ne e pranojmë kritikën e BE-së sa i përket gjyqësorit dhe prokurorisë. Prandaj, reformat kanë filluar”, deklaroi ai.

Kurti përmendi edhe themelimin e Byrosë për Verifikimin dhe Konfiskimin e Pasurisë së Pajustifikueshme, duke thënë se procesi i integrimit evropian do të ndihmonte më tej në reformimin e drejtësisë, administratës publike dhe arsimit.

Sa i përket Planit të Rritjes të BE-së për Ballkanin Perëndimor, kryeministri tha se Kosova ka humbur rreth 40 milionë euro për shkak të krizës politike dhe bllokadës në Kuvend.

Megjithatë, ai u shpreh se tashmë institucionet janë funksionale dhe se Qeveria do t’i zbatojë reformat e parapara, edhe nëse për to nuk sigurohen fondet evropiane.

Në pjesën e intervistës për raportet me Serbinë, Kurti foli për zgjedhjet e 25 tetorit në këtë vend, duke i cilësuar ato më shumë si referendum kundër ish-presidentit Aleksandar Vuçiq sesa si zgjedhje të zakonshme.

Ai tha se ende nuk dihet se kush i ka fituar zgjedhjet, pasi Lista Studentore duhet së pari të formojë qeverinë dhe të bëhen të qarta orientimet e saj politike.

Ndërkaq, për dialogun Kosovë-Serbi, Kurti përsëriti qëndrimin se normalizimi i plotë i marrëdhënieve duhet të bazohet në njohjen reciproke.

“Dëshirojmë normalizim të plotë të marrëdhënieve me Serbinë, të përqendruar në njohjen reciproke. Nuk ka makinë kohe për t’u kthyer në shekullin e 20-të, kur ishim të pushtuar nga Serbia. Kosova është shtet i pavarur, republikë demokratike”, tha Kurti.

Ai theksoi se është i gatshëm të respektojë dhe zbatojë Marrëveshjen e Brukselit dhe Aneksin e Zbatimit të Ohrit të vitit 2023, por kërkoi që ato të nënshkruhen nga të dyja palët për të garantuar siguri juridike dhe besueshmëri në proces.

Lista jote

Lexo më vonë.

Artikujt e ruajtur në këtë pajisje.

Ende nuk ke ruajtur artikuj. Hap një lajm dhe shtyp “Ruaj”, për ta lexuar më vonë.