Kryeministri Albin Kurti nuk është deklaruar ende lidhur me situatën sa i përket ngritjes së tarifës për tatimin në pronë.
Ai këtë të mërkurë ka prezantuar arritjet për komunat dhe zhvillimin rajonal gjatë vitit 2022.
Postimin për këtë pjesë ai e ka nisur me grantin e performancës komunale duke përmendur vlerën prej 8 milionë euro.
Më tej ai ka përmendur bashkëpunimin ndërkufitar me vendet e rajonit, pa përfshirë Serbinë dhe ndarjen e 25 milionëve.
Në pjesën më poshtë i gjeni të renditura ato që ai i ka konsideruar si të arritura për vitin e kaluar:
2022: Qeveria për komuna dhe zhvillim rajonal
– Granti i performancës komunale në vlerë 8 milionë euro;
– Ndamë 1.5 milion euro për “Programin Komunal për zhvillim të infrastrukturës socio-ekonomike dhe bashkëpunim ndërkomunal”;
– Zbatuam:
– Projektin “Municipality 4 Youth” me vlerë 2,7 milionë dollarë;
– Programin për Zhvillim Rajonal: 17 projekte të investimeve kapitale në 16 komuna, në vlerë prej 1,4 milion euro;
– Programin për Zhvillim Rajonal të Balancuar në vlerë 3 milionë euro. Përfituan 335 biznese dhe gjeneruam 770 vende të reja pune;
– Programin për bashkëpunim me OShC, në vlerë prej 107 mijë euro. Nga 38 projekte, përfituan 200 të rinj dhe gra;
– Avancuam bashkëpunimin ndërkufitar me Shqipërinë, Maqedoninë e Veriut dhe Malin e Zi. Janë paraparë mbi 25 milionë euro;
– Inicuam zhvillimin e portalit E-Komunat për digjitalizim në nivel lokal;
– Mbështetëm komunitetet nëpërmjet Fondit prej 1 milion euro;
– Forcuam të drejtat e komuniteteve nëpër komuna;
– Hartuam Planin Kombëtar të Veprimit për Partneritetin për Qeverisje të Hapur – PQH me qëllim të anëtarësimit në organizatën ndërkombëtare PQH;
– Miratuam Strategjinë Kombëtare për menaxhimin dhe kontrollin e qenve me dhe pa pronar.