Kryeministri i Kosovës, Albin Kurti, ka zhvilluar një bisedë me kancelarin gjerman Friedrich Merz në kuadër të Samitit XIII të Procesit të Berlinit, nga i cili ka pranuar urime për mandatin e ri.
Përmes një postimi, Kurti ka theksuar rëndësinë e Gjermanisë për Kosovën dhe rolin e Procesit të Berlinit në bashkëpunimin rajonal dhe integrimin evropian të vendeve të Ballkanit Perëndimor, raporton lajmi.net
Ai ka rikujtuar se Gjermania e nisi këtë nismë në vitin 2014, duke krijuar një platformë ku gjashtë vendet e Ballkanit Perëndimor trajtohen në mënyrë të barabartë.
Kurti ka përmendur edhe marrëveshjet e nënshkruara në kuadër të këtij procesi, përfshirë udhëtimin me letërnjoftime dhe njohjen e diplomave, duke theksuar se Kosova i ka zbatuar të gjitha marrëveshjet dhe se edhe vendet e tjera duhet të veprojnë njësoj.
“Askush nuk mund ta mbajë peng rajonin”, ka shkruar Kurti, duke bërë thirrje për zbatimin e zotimeve të përbashkëta.
Duke folur për bashkëpunimin ekonomik me Gjermaninë, kryeministri ka bërë të ditur se investimet direkte gjermane në Kosovë arrijnë në rreth 1.5 miliardë euro, ndërsa 62 për qind e tyre janë realizuar vetëm gjatë pesë viteve të fundit.
Sipas Kurtit, potencial i madh për bashkëpunim mbetet në sektorët e industrisë, energjisë, transportit, teknologjisë së informacionit dhe komunikimit (TIK), si dhe arsimit profesional.
Ai ka njoftuar gjithashtu se javën e ardhshme Prishtina do të mirëpresë Forumin e tretë Ekonomik Gjermano-Kosovar.
Kurti ka ritheksuar rëndësinë e partneritetit me Berlinin për perspektivën evropiane të Kosovës, duke e falënderuar kancelarin Merz për takimin./Lajmi.net/