Shefja e Grupit Parlamentar e VV-së, Arbërie Nagavci ka folur rreth vendimit të kthimit të Ligjit për Speciale në Kuvend.
Pas mbledhjes së Kryesisë së Kuvendit, Nagavci potencoi se tashmë Parlamenti përballet me dy mundësi, transmeton Klankosova.tv.
“Ne e dimë që proceduralisht pas kthimit të Projektligjit nga Presidentja, janë dy mundësi, që Kuvendi me 61 vota ta hedh poshtë vendimin e presidentes, apo e kundërta, ta miratojë propozimin për rikthimin e Projektligjit”, u shpreh Nagavci.
Ajo shtoi se kjo çështje do të trajtohet me kujdes.
“Qëndrimet e Lëvizjes i dini. Vazhdojmë të kemi të njëjtin qëndrim që ka qenë gabim krijimi i Dhomave të Specializuara. E dyta, vlerësojmë se aktgjykimi për dënimin e krerëve të UÇK-së është i padrejtë, dhe e njëjta çështje duhet të adresohet kujdesshëm në Gjykatën e Apelit. Sa i përket ligjit specifik, i kemi pasur dilemat tona. Është keq që jemi në një situatë që u kthyem në pikën zero…”, u shpreh ajo.
“Përpara se të deklarohemi se a jemi pro mbështetjes së PDK-së në këtë pikë, duhet të dimë se çfarë po kërkon PDK-ja të ndryshojë, cilat nene specifikisht”, shtoi deputetja.