Një deklaratë e Kylian Mbappés ka shkaktuar një krizë të papritur mes futbollit spanjoll dhe Kinës, duke sjellë pasoja jo vetëm për yllin francez, por edhe për Real Madridin dhe La Ligën.
Polemika nisi pas një interviste në emisionin francez “The Bridge”, ku sulmuesi madrilen foli për një meme që e paraqiste fytyrën e tij mbi imazhin e një diktatori kinez, në një referencë ndaj ish-liderit Mao Ce Dun.
Reagimet në Kinë ishin të ashpra. Çështja mori përmasa të mëdha, duke përfshirë mediat shtetërore, kompanitë sponsorizuese dhe institucionet sportive.
Televizioni shtetëror kinez ndërpret transmetimet e La Ligës
Pas polemikës, televizioni shtetëror kinez vendosi të pezullojë transmetimin e ndeshjeve të La Ligës.
Masa përfshiu gjithashtu përmbajtjet e lidhura me Mbappén dhe reklamat ku shfaqej futbollisti francez.
Vendimi përbën një goditje të rëndësishme për kampionatin spanjoll, i cili ka investuar për vite me radhë në zgjerimin e audiencës dhe marrëdhënieve tregtare në tregun kinez.
Pasojat nuk u ndalën te transmetimet televizive. Disa kompani kineze, përfshirë Dongpeng, Mengniu dhe Milkground, njoftuan ndërprerjen e bashkëpunimeve të tyre tregtare me Mbappén.
Ndërkohë, llogaritë e futbollistit në disa platforma kineze u kufizuan, ndërsa polemika vazhdoi të shkaktonte reagime të shumta në rrjetet sociale.
Real Madridi kërkon të shuajë polemikën
Përballë situatës së krijuar, Real Madridi publikoi një deklaratë zyrtare, përmes së cilës kërkoi falje ndaj popullit kinez për shqetësimin e shkaktuar nga komentet e futbollistit të tij.
Klubi madrilen theksoi respektin për Kinën, historinë, kulturën dhe qytetarët e saj, si dhe për miliona tifozët kinezë që mbështesin Real Madridin.
Edhe vetë Mbappé kërkoi falje publikisht, duke pranuar se komenti i tij ishte i pamenduar mirë dhe se tashmë e kuptonte se fjalët e tij kishin lënduar shumë njerëz në Kinë dhe në komunitetet kineze në mbarë botën.
Presidenti i La Ligës, Javier Tebas, gjithashtu shprehu keqardhje për situatën dhe zhvilloi kontakte me përfaqësues diplomatikë kinezë për të gjetur një zgjidhje.
Megjithatë, pavarësisht kërkimfaljeve, autoritetet mediatike kineze nuk dhanë sinjale të qarta se transmetimet do të riktheheshin menjëherë.
Kriza tregon se si një deklaratë e vetme mund të shndërrohet në një problem të madh për klubet dhe institucionet sportive, veçanërisht kur përfshihen tregje të rëndësishme ekonomike dhe marrëdhënie të ndërtuara ndër vite. /Zëri