Kompania Anthropic, krijuesja e asistentit të inteligjencës artificiale Claude, po përballet me një padi nga mbajtësit e të drejtave të Elvis Presley-t, të cilët e akuzojnë se ka përdorur pa autorizim 274 këngë të legjendës së muzikës për trajnimin e modeleve të saj.
Padia u depozitua më 23 tetor në një gjykatë federale në Kaliforni nga një kompani bijë e Authentic Brands Group, e cila administron një pjesë të konsiderueshme të të drejtave të pronësisë intelektuale të Presley-t.
Mes këngëve të përmendura në padi janë Can’t Help Falling in Love, Don’t Be Cruel dhe A Little Less Conversation. Sipas paditësve, Anthropic i ka kopjuar dhe ruajtur këto vepra në një bibliotekë të brendshme për trajnimin e modeleve aktuale dhe të ardhshme të inteligjencës artificiale, pa marrë licencë dhe pa paguar kompensimin përkatës.
Për këtë çështje, kompania mund të përballet me dëmshpërblime që tejkalojnë 40 milionë dollarë. Avokati i paditësve, Richard Busch, deklaroi se qëllimi i padisë është mbrojtja e të drejtave ekskluzive mbi këngët, duke akuzuar kompaninë për shkelje të të drejtave të autorit në një shkallë të paprecedentë.
Nga ana tjetër, Anthropic i tha NBC News se nuk pajtohet me pretendimet dhe se do ta mbrojë çështjen në gjykatë. Kompania ka argumentuar më parë se përdorimi i materialeve të mbrojtura nga e drejta e autorit për trajnimin e modeleve të inteligjencës artificiale mund të lejohet sipas doktrinës amerikane të përdorimit të drejtë (fair use).
Kjo nuk është padia e parë ndaj Anthropic për çështje të ngjashme. Në vitin 2023, disa kompani të mëdha muzikore e paditën për riprodhimin e pretenduar të teksteve të këngëve pa autorizim. Këtë vit, edhe Sony Music Publishing dhe Warner Chappell ngritën padi, duke pretenduar se kompania kishte përdorur tekste këngësh dhe partitura të mbrojtura për trajnimin e Claude.
Anthropic është përballur gjithashtu me një padi nga autorë librash, e cila përfundoi me një marrëveshje dëmshpërblimi prej 1,5 miliardë dollarësh në korrik.