Deputetja e Aleancës për Ardhmërinë e Kosovës (AAK), Time Kadrijaj, ka deklaruar se partia e saj do t’i përkrahë ndryshimet e propozuara në Ligjin për Dhomat e Specializuara.
Në një lidhje direkte në emisionin “Kosova Live” në T7, Kadrijaj ka thënë se Aleanca ka qenë në mbështetje të këtyre ndryshimeve, pavarësisht se nuk është konsultuar për tërheqjen e projektligjit dhe nuk ka qenë në dijeni të arsyeve që çuan në këtë vendim.
Ajo ka rikujtuar se AAK-ja kishte votuar kundër themelimit të Dhomave të Specializuara, por kishte shprehur gatishmëri për të mbështetur ndryshimet ligjore të propozuara.
“Përkundër që Aleanca nuk e ka votuar ligjin për Dhomat e Specializuara, kemi qenë kundër, kemi dhënë votën kundër. Përkundrazi, ne kemi dalë në krahë dhe në momentin që është proklamuar një ligj që do të bëhen disa ndryshime, e kemi përkrahur në tërësi”, ka deklaruar Kadrijaj.
Ajo ka shtuar se, ndonëse partia nuk është konsultuar lidhur me tërheqjen e projektligjit, qëndrimi i saj për mbështetjen e ndryshimeve mbetet i njëjtë. /Lajmi.net/